Sèries tv, film e documentàrios. sa Sardigna est torra unu set tzinematogràficu mannu

Su Gazetinu, lunis 26 de mese de ledàmene de su 2026

Sèries tv, film e documentàrios. sa Sardigna est torra unu set tzinematogràficu mannu – Dae Hollywood a is fèstival internatzionales, sa Sardigna bivet unu mese de ledàmene che a protagonista in su set e in is salas, cun dòighi produsimentos intra de film, sèries tv e documentàrios. Unu fermentu chi, comente sutalìniat s’assessora regionale Ilaria Portas, cunfirmat su valore de su tzìnema “comente a resursa culturale e econòmica pro s’ìsula”, capatza de arranguitzare investimentos e de avalorare a is persones ingeniosas locales.

Intra de is film prus de importu “Zustìssia”, prima proa de Francesco Piras lòmpida a tzìnema su 15 de mese de ledàmene. Prodùsidu dae Palomar e PiperFilm cun Rai Tzìnema e Netflix, su film cun Fabrizio Ferracane e Michele Riondino contat is 33 annos passados in presone dae Beniamino Zuncheddu, sende innotzente.

A sa Festa de su Tzìnema de Roma ddoe est lòmpidu fintzas “Alberi erranti” de Salvatore Mereu, bogadu dae su romanzu de Alberto Capitta e giai presentadu in Locarno, essidu in is salas sardas su 22 de mese de ledàmene, mentras in Itàlia est essidu su 29.

Su 17 de mese de ledàmene passadu, imbetzes, in s’Auditorium de su MAXXI, in sa Festa de su Tzìnema de Roma est essidu in prima mundiale su documentàriu “Eva Mameli Calvino. Sa Sennora de is frores” de Alessandra Usai e, in sa setzione Freestyle, sa sèrie “177 dies. Su secuestru de Farouk”, ghiada dae Carlo Carlei.

In Nàpoli, su fèstival Artetzìnema at presentadu a “Costantino Nivola. Una die de pitzinnia” de Vittoria Soddu, dedicadu a is raighinas sardas de s’artista de Orane. In Casteddu, su 27 e 28 de mese de ledàmene, s’ant a pòdere bìere is documentàrios “Ite abarrat cando su mare si movet” de Gaetano Crivaro e “The Lunch – A Letter to America” de Gianluca Vassallo. S’abetat pro onniasantu, in fines, “Dae su nudda”, thriller ìtalu-canadesu de Joe Juanne Piras giradu intra de is montes de sa Barbàgia.

Ma s’ìsula acasàgiat fintzas set internatzionales: in Gaddura si girat “Un weekend da bamboccioni 3” cun Adam Sandler peri Netflix, in Crabonaxa sa sèrie Prime Video “Duos coros a pesone” e in s’Asinara “Lo consegnato” de Margherita Panizon.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata