In Sardigna movent is bòlidos internos

Su Gazetinu, mèrcuris 8 de trìulas de su 2026

In Sardigna movent is bòlidos internos – Dae Casteddu a S’Alighera o a Terranoa in apenas trinta minutos, sena de fàghere oras e oras de màchinas in s’Istatale 131. Est mòvida sa triva de sa Regione Sardigna pro favorèssere is collegamentos intra de una cussòrgia e s’àtera gràtzias a bòlidos assegurados dae Aeroitalia, pensados pro agiudare is biàgios de residentes e turistas in s’istadiale.

Dae sa coa de chida passada ant incarreradu is bòlidos intra de Casteddu e is aeroportos de S’Alighera e Terranoa, in programma ònnia lunis e chenàbura fintzas a su 31 de austu.

Ma non bastat: est cumentzadu fintzas su collegamentu deretu cun Lamètzia Termas, chi ddu faghent su martis e su sàbadu. Totu is bòlidos ddos ant a assegurare cun aeromòbiles ATR 72 cun 68 postos. Ddoe at curiosidade manna pro custa noa, ma nùmeros ancoras bassos meda. Su primu bòlidu chi arribaiat dae S’Alighera est aterradu in Su Masu cun unos binti minutos de atràssiu e cun prus pagu de deghe passigeris. Prus abitadu, imbetzes, su collegamentu dae Terranoa, mentras is bòlidos de torrada dae su cabulogu ant propassadu is binti presèntzias, sinnale custu de un’interessu chi forsis at crèschere in is chidas imbenientes. Is oràrios, pro immoe, non permitint comente si siat su andare e torrare in sa pròpria die. Dae S’Alighera si decollat a is 12.10 cun arribu a Su Masu a is 12.40, mentras su bòlidu de torrada movet a is 15.40. Dae Casteddu a Terranoa su bòlidu si previdet a is 13.20, cun torrada a is 14.30. Su bòlidu cara a Lamètzia Termas movet a is 11.20, cun torrada dae sa Calàbria a is 13.20.

Pro favorèssere s’impreu de custu servìtziu, is passigeris de is bòlidos internos podent gosare gratis de su Controllu Lestru in is aeroportos de Su Masu, S’Alighera e Terranoa, ismenguende duncas is tempos de abetu pro s’imbarcu. Is billetes sunt giai in bèndida cun costos cumentzende dae 34,99 èuros a biàgiu, ma su prètziu diat pòdere mudare segundu sa die e sa disponibilidade.

Custa isperimentatzione de istadiale punnat a fàghere a manera chi is bòlidos internos siant un’alternativa utilosa a is biàgios terra-terra peri is bias sardas.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata