Cabudanni in s’Ìsula comintzat cun una coa de chida prena de eventos

Su Gazetinu, chenàbura 4 de cabudanni de su 2026

Cabudanni in s’Ìsula comintzat cun una coa de chida prena de eventos – Sa coa de chida de su 5 e 6 de cabudanni proponet in Sardigna unu calendàriu de apuntamentos bundante meda, chi aunit isport, traditzione populare e cultura in paritzos logos de s’Ìsula.

Si movet cun s’incomintzu ufitziale de Atùngiu in Barbàgia 2026, biàgiu traditzionale in sas biddas de intro de Sardigna dedicadu a cultura, artesanadu e sabores locales: sa prima firmada est in Bitzi, in sas dies de sàbadu e de domìniga.

In Biddanoa ‘e Forru sàbadu 5 comintzat sa de 4 Biennales de Arte Contemporànea a incuru de Antonio Russo cun òperas de 19 artistas, chi si podet bìere finas a su 27 de cabudanni.

Sighint su Karel Music Expo de Casteddu, in programma finas a su 5 de cabudanni, su fèstival “Musica sulle Bocche” in su Nord de Sardigna e su Cabudanne de sos poetas in Sèneghe, ambos abertos finas a su 6 de cabudanni cun deghinas de apuntamentos musicales e literàrios.

In Terraba, sàbadu 5 de cabudanni torrat sa Marcialonga Terrabesa, cursa a pee agonìstica e amatoriale isetada meda chi ocannu imbatet a sa de 40 editziones, aunida a su de V Memorial Cenza Schirru. S’atopu est fissadu pro sas 4 (h 16) in Pratza de sos Mortos in su Traballu, sighidu a sas 4 e mesa (h 16:30) dae su postaleddu chi andat a Marceddì. Si previdet de mòvere a sas 6 (h 18) pro su percursu de 13 km e chentu, e prus o mancu a sas 6 e binti (h 18:20) pro cussu de 5 km e chentu, peri un’itineràriu panoràmicu chi passat peri sa bidditzola, sa bonìfica e sa bidda de Terraba.

Semper in sa matessi coa de chida, in Aristanis sighit su programma ricu de su Cabudanne Aristanesu 2026: sàbadu 5 de cabudanni su Palasport Sa Rodia òspitat su basket importante cun s’isfida Dinamo Tàtari – Valtur Brindisi, e in sos parchègios de Sa Rodia si rapresentat s’eventu musicale “Metal in Contea”. Domìniga 6 de cabudanni, in Pratza Luigi Pintus, campu a sa de 17 editziones de sa gara tziclìstica “Coppa Santa Barbara – Memorial Beppe Meloni”.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata