Sa Sardigna a su segundu postu in Itàlia pro crèschida de sas impresas artesanas

Su Gazetinu, martis 18 de austu de su 2026

Sa Sardigna a su segundu postu in Itàlia pro crèschida de sas impresas artesanas – Sa Sardigna si cunfirmat intro de sas regiones prus ativas de Itàlia in su setore de s’artesanadu. In su segundu trimestre de su 2026, sas impresas artesanas registradas in s’Ìsula sunt 33.935, e de custas 33.716 sunt ativas e rapresentant prus de su 20% de totu sas impresas sardas.

Su datu prus de importu est su livellu de crèschida: +0,68%, chi dat a sa Sardigna su segundu postu natzionale, superende sa mèdia italiana firma a su +0,43% e su resurtadu bonu de s’annu passadu (+0,63%). Prima in classìfica sa Valle d’Aosta ebbia, crèschida de su 0,97%. Su saldu regionale est positivu de 230 unidades, chi est su resurtadu de 639 aberturas e 409 serradas in su tempus cunsideradu.

Sos prus de 80 mìgia chi traballant in su setore rapresentant prus de su 20% de su totale de sos ocupados regionales.

In particulare su 42,2% de sos chi traballant in su setore de sas Manifaturas, su 57,2% de sos chi traballant in su setore de sos Fràigos e s’11,8% de sos chi traballant in su setore de sos Servìtzios òperant in realidades artesanas. A livellu provintziale, Casteddu ghiat sa classìfica cun 12.415 impresas registradas e una crèschida de su 0,73%, a pustis b’est Tàtari – Gaddura cun 12.367 unidades e unu tassu de su +0,99%, e a pustis Nùgoro cun 6.810 impresas e +0,27%. Prus pagu in Aristanis: 2.343 impresas artesanas in totu e unu saldu de +1 ebbia, dadu dae 34 aberturas e 33 serradas.

“Sa crèschida registrada rapresentat sa cunfirma de su traballu fatu dae sos imprendidores paris cun sa Regione”, narat Giacomo Meloni, presidente de Confartigianato Imprese Sardegna, ammentende su finantziamentu de sa Lege Artigiana 949, chi at postu a disponimentu de su cumpartu 120 milliones de èuros “cun fòrmulas lestras e de importu”. Meloni marcat intre sos sinnales prus positivos sa nàschida de impresas prus organizadas e sa crèschida de sas atividades ispetzializadas in sos servìtzios pro sa domo. “Sas impresas piticas sunt dimustrende de ischire isfrutare sas oportunidades chi bi sunt e de si aprontare a cussas chi ant a bènnere “, concruit su presidente, abbaidende cun otimismu a sos meses chi devent bènnere.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata