Màrmuru e pedras, Sardigna bene pro su chi pertocat impresas e traballadores, ma s’esportatzione arrancat

Su Gazetinu, lunis 21 de cabudanni de su 2026

Màrmuru e pedras, Sardigna bene pro su chi pertocat impresas e traballadores, ma s’esportatzione arrancat – Màrmuru e pedras pro ondramentu sunt unu setore de primore pro sa Sardigna, ma custu importu no agatat sa domanda de is mercados èsteros. Est su chi nde essit a pìgiu dae sa relata in contu de su “Màrmuru, is punnas de s’istadiale 2026” de Confartesania Sardigna, relata fata a tenore de is datos Istat.

S’Ìsula est sa de duas regiones in Itàlia, a pustis de su Molise, pro su chi pertocat s’intzidèntzia de is traballadores de is cavas in su totale de s’economia regionale. Sunt 416 is impresas de custu setore, cun 1522 traballadores. Sa parte de is traballadores artesanos est de su 46,2%, contras de su 38,5% de sa mèdia a livellu italianu.

Is provìntzias de Tàtari-Gaddura contant su nùmeru prus artu de impresas artesanas chi traballant sa pedra (185 e, de custas, 69 artesanas), sighidas dae cussas de Nùgoro (103, 58 artesanas), Casteddu (87 e, de custas, 36 artesanas) e Aristanis (41 siendas, 19 artesanas). Nùgoro si sèberat fintzas pro s’intzidèntzia de s’ocupatzione, in su de bator postos intra de is provìntzias italianas. Dda sighint a pagu tretu Aristanis (su de 11), Tàtari (su de 20), su Sud Sardigna (su de 38) e Casteddu (sa de 45).

Ma is barrancos pertocant s’export. Sa punna a bèndere foras de làcana si firmat a su 0,05, contras de su 0,17 de sa mèdia italiana. In su 2024 is esportatziones de pedras segadas e traballadas in Sardigna sunt lòmpidas a 23,346 milliones de èuros, ma cun un’ismèngua de su 39% cunforma a su 2023. Sa prus parte manna de sa pedra, in prus, si bendet a impresas de sa Penìsula, chi dda traballant.

Energia e internatzionalizatzione sunt is barrancos chi tocat de ddoe parare fronte. “Is impresas sufrint ancoras pro ite ca sunt piticheddas, sufrint sa pagu seguresa de su prètziu de s’energia e, in prus, non sunt pràticas meda cun is esportatziones”, narat Giacomo Meloni, presidente de Confartesania Impresas Sardigna. E dae inoghe movet sa domanda a sa Regione de intervènnere pro ismenguare su costu de is bulletas e pro favorèssere s’internatzionalizatzione de is impresas piticas e mesanas.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata