Sa Regione Sardigna agiudat sa gherra contras de sa freadura de is costeras de mare

Su Gazetinu, lunis 29 de làmpadas de su 2026

Sa Regione Sardigna agiudat sa gherra contras de sa freadura de is costeras de mare – Sa Regione est pensende de incarrerare interventos noos pro chircare de firmare sa freadura naturale de is costeras in Sardigna: sa Giunta regionale at aprovadu su de bator tretos de su programma triennale pro interventos de cualificatzione ambientale noa e gherra contras de sa freadura de is costeras, a tenore de sa proposta de s’assessora de sa Defensa de s’Ambiente Rosanna Laconi, a manos de pare cun s’assessore de sa Programmatzione Giuseppe Meloni. Su finantziamentu in totu est de 7 milliones e 175 mìgia èuros, postos a intro de su bilàntziu 2026-2028.

Su dinari interessat chimbe comunes: Badesi, Sossu, Tàtari, Arborea e Santu Diadoru. Su sèberu dd’ant fatu a tenore de su livellu de progetatzione de is interventos, chi depiat èssere avantzadu, est a nàrrere giai lòmpidu a sa fase de progetu de fatibilidade tècnica e econòmica e frunidu giai de totu is parres chi serbint.

Una chistione de importu de su programma est su Finantziamentu de fùrriu, chi at permìtidu a is entes locales de finantziare sa progetatzione sena de carrigare s’ispesa in su bilàntziu issoro, faghende a manera de àere aici òperas in deretura cantieràbiles. De 35 progetos finantziados, sunt chimbe isceti is chi ant acabbadu s’iter tècnicu-amministrativu e chi ant a pòdere duncas gosare de custu finantziamentu.

Su provedimentu faghet parte de una trassa regionale a simana longa incarrerada in su 2011 e afortiada in su 2021 cun àteras resursas. Is tres partes giai cumpridas aiant pertocadu 19 comunes sardos, cun 12 milliones de èuros; cun custu interventu nou is investimentos creschent in totu fintzas a 19 milliones e 175 mìgia èuros. Sa programmatzione faghet parte de is tareas de su Programma Regionale de Isvilupu 2024-2029 e de s’Istrategia Regionale de adatamentu a is mudaduras de su clima.

“Amparare prajas e rocas bolet nàrrere a amparare ecosistemas, paesàgiu e comunidades de cussos logos, afortiende in su pròpriu tempus sa capatzidade de su territòriu de parare fronte a is cunsighèntzias de is mudaduras de su clima”, at naradu s’assessora Laconi.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata