Prus pagos ischermos, prus chistionu: a is ristorantes sardos arribat “Acòrdiu in sa mesa”

Su Gazetinu, mèrcuris 4 de onniasantu de su 2026

Prus pagos ischermos, prus chistionu: a is ristorantes sardos arribat “Acòrdiu in sa mesa” – Ddoe at una manera diferente de abetare unu màndigu in ristorante: sena de sucùrrere vìdeos in su telefoneddu, ma gioghende, colorende e chistionende cun is chi portamus a fache. Custa est s’isfida de “A mesa sena de ischermos”, su progetu de sa Garante regionale pro sa pipiesa e s’adolescèntzia Anna Cau cun Fipe Confcummèrtziu Sardigna, chi interessat 15 ristorantes de s’Ìsula pro unu mese.

Su coro de su progetu est su “Acòrdiu in sa mesa”, chi invitat a mannos e minores a lassare arrimados a una parte is telefoneddos in s’ora de su gustu. Pro is prus piticos si previdet su Kit de su s’agatare, cun giogos e fainas manuales, mentras a is mamas e babbos ddis ant a dare materiale de informu.

Is datos de sa ghia de sa Federatzione italiana de is mèigos pediatras (Fimp) fotògrafant su chi acontesset: su 95% de is adolescentes italianos impreat a manera regulare su telefoneddu e prus de sa metade ddu lassat allutu a totu die e a totu note. Unu ònnia bator mustrat sinnos de impreu cun dificultade, mentras s’87% de is genitores de preadolescentes pregontat prus informos.

Anna Cau at sutaliniadu s’importu de amparare a is pitzocheddos dae s’aprofitamentu de custos trastos e dae is contenutos no adatos, ma fintzas is cunsighèntzias possìbiles pro sa salude, cosa – custa – chi ponet pistighìngiu.

“Sa prus parte manna de is mamas e babbos non nde tenet cuscièntzia, bolent educados cara a s’atinu de is arriscos ma fintzas de su profetu de sa tecnologia”, at naradu Osama Al Jamal, presidente de sa Fimp Sardigna. Intra de is acontèssidos sinnalados ddoe sunt insònnia, isulamentu sotziale e autolesionismu. Su chi noghet est fintzas su chi si biet in is telefoneddos, no isceti su tempus passadu ananti de s’ischermu.

Pro Emanuele Frongia, presidente de Fipe Confcummèrtziu Sardigna, “unu ristorante est unu logu in ue si benit a pare cun àtera gente, si chistionat e si cumpartzit una parte de su tempus”. S’esempru, at naradu, depet lòmpere dae is mannos.

A custu progetu ddoe ant pigadu parte ristorantes de Aristanis, Casteddu, Nùgoro, Terranoa e S’Alighera. Sa punna est de ammanniare sa retza e mudare s’esperièntzia bella a avesu chi tocat de sighire fintzas in domo.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata