Turismu e artesanadu: duos setores de importu mannu pro s’Ìsula

Su Gazetinu, martis 1° de cabudanni de su 2026

Turismu e artesanadu: duos setores de importu mannu pro s’Ìsula – In Sardigna un’impresa artesana subra chimbe traballat pro su turismu.

In sa segunda metade de su 2026 sas aziendas de su setore registradas in sas Càmeras de Cummèrtziu sunt 6.551, con un’aumentu de 610 unidades in cunfrontu a s’annu passadu, pro unu totale de giai 17mìgia dipendentes. Custu datu essit a campu dae s’anàlisi de s’Ufìtziu Istùdios de Confartigianato Imprese Sardegna dae datos Istat, UnionCamere e InfoCamere.

Su 19,4% de sas giai 34mìgia impresas artesanas isulanas si òcupat, o a manera dereta o in sas atividades collegadas, de turismu: dae s’agru-alimentare a sos trasportos, dae sos ristorantes a s’artesanadu artìsticu, dae sa cura de sa persone a sas istruturas de retzire gente. Unu resurtadu chi ponet sa Sardigna a su de bator postos in Itàlia pro importu de s’artesanadu in sos setores de sa rechesta turìstica, a pustis de sa Sitzìlia (23,1%), de sa Calàbria (20,8%) e de sa Campània (20,5%), e a subra de sa mèdia natzionale a su 16,7%. Sos setores printzipales sunt sas manifaturas e sos servìtzios cun 1.408 impresas, 1.400 ristorantes e pitzerias, s’agru-alimentare cun 1.368 e su trasportu de biagiadores cun 1.131.

«Non b’at turismu in Sardigna sena s’artesanadu», narat Giacomo Meloni, presidente de Confartigianato Sardegna, ammentende chi sos bisitadores istràngios, sos prus a dies de oe, «non chircant ebbia unu logu in ue dormire, ma s’emotzione de una prenda de filigrana, su sabore de unu produtu agru-alimentare beru o s’unitzidade de un’ogetu de tzeràmica fatu a manu ».

Ma a canta a sa crèschida b’at puru crititzidades: in fatis su 46% de su personale est difìtzile de agatare. Pro s’istiu 2026 sunt prus de 16mìgia sas assuntziones preventivadas in su setore, in aumentu de su 4,4% in cunfrontu a su 2025. «A ischire chi giai sa metade de sas positziones arriscat de abarrare vacante est unu sinnale malu chi non podimus fàghere finta de no ischire», avertet Meloni.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata