Einstein Telescope: in austu via a su progetu MITI

Su Gazetinu, martis 14 de trìulas de su 2026

Einstein Telescope: in austu via a su progetu MITI – Sa cursa de sa Sardigna pro retzire su Einstein Telescope faghet un’àteru passu a dae in antis. Dae sa prima die de austu at a comintzare su MITI (Multimessenger Infrastructures and Technologies in Italy), su progetu finantziadu dae su Ministeru de s’Universidade e de sa Chirca cun prus o mancu 15 milliones de èuros pro acrèschere sas tecnologias chi ant a serbire pro s’osservatòriu europeu de sas undas gravitatzionales e pro afortigare sa rete de sos laboratòrios de chirca italianos.

S’initziativa sighit s’òpera de ETIC, su progetu PNRR finidu in làmpadas chi at istudiadu sa fatibilidade de su situ de Sos Enatos, in su Nugoresu, candidadu a retzire s’impiantu iscientìficu, e at comintzadu una rete de laboratòrios ispetzializados. In sos 30 meses chi ant a bènnere MITI at a afortigare cussu traballu, puntende subra s’innovatzione tecnològica e interessende sas impresas.

Pro s’Ìsula su progetu rapresentat una cosa de importu. In Casteddu s’at a potentziare ancora de prus su laboratòriu ETICO2, mentres in Sos Enatos est a canta a comintzare su cantieri de su SUnLab, su laboratòriu suta terra multi-disciplinare, destinadu a divènnere unu tzentru de chirca internatzionale e de trasferimentu tecnològicu e chi at a acòllere fintzas unu telescòpiu terrestre de abertura manna, naradu “Mezzo Cielo”.

Un’oportunidade fintzas pro sas impresas sardas chi imbestint in s’innovatzione. “Sa risposta manna registrada pro su bandu de Sardegna Ricerche rivòlgidu a sas aziendas sardas pro s’isvilupu de tecnologias abilitantes pro su ET”, narat sa presidente de sa Regione Sardigna, Alessandra Todde, “dimustrat chi bi sunt sas cumpetèntzias pro èssere protagonistas in su fàghere progetos de importu internatzionale, isvilupare tecnologias noas e creare traballu cualificadu”.

Su progetu MITI interessat fintzas sos laboratòrios INFN de Perùgia (ente capu-fila), Roma, Nàpoli, Gènova e sos Laboratòrios Natzionales de su Sud.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata