Una coa de chida de eventos in Sardigna

Su Gazetinu, chenàbura 16 de santugaine de su 2026

Una coa de chida de eventos in Sardigna – Dae sas cortes abertas a sos burgos de su binu, dae sa mùsica a sos itineràrios culturales: sunt meda sos eventos in s’Ìsula pro sa coa de chida.

Cun domos istòricas abertas, artesania, màndigos tìpicos e traditziones “Atùngiu in Barbàgia” firmat in Brebì e in Orgòsolo. In Gèsigu finas a lunis sighit sa de 34 Sagras de sa Tzintzigorra cun assàgios de màndigos, butegheddas, ispetàculos e ammentos istòricos. In Serramanna cras e domìniga b’est sa de 5 editziones de sa Sagra de su Culurgione e Sètimu festat sa Malvasia cun tres dies de assàgios in sas domos campidanesas. In sas matessi dies Tèmpiu òspitat Borgo diVino, unu biàgiu intre sos binos e sos màndigos tìpicos.

In Arborea cras e domìniga torrat sa de 43 editziones de sa Sagra de sa Pulenta e in Pompu domìniga Fromentu – Bread Experience esaltat su pane cun laboratòrios, atopos e assàgios.

Finas a cras Terranoa òspitat Olbia Onde – Urban Music Experience cun Skin comente protagonista de su sero finale, a pustis de Simioli e Trasko. In su golfu de Terranoa s’at a fàghere finas su Grand Prix of Italy de Aquabike. In Biddaspitziosa domìniga in Abaco Teatro comintzat s’istajone de atùngiu cun Folk&Roll de sos Symponia, e in su CineTeatro de Lungoni b’est s’ispetàculu de Paolo Ruffini.

Campu lìberu a sas passigiadas culturales: sas Dies de su Romànicu faghent abèrrere sas crèsias medievales in paritzas biddas de s’Ìsula, dae Bosa a Uda, dae Codronzanu a Patiolla. In Àggju, sàbadu, Fili di Grazia proponet un’itineràriu de FAI dedicadu a Gràssia Deledda, in mesu de tessìngios, museos e paesàgios.

In zona de Aristanis, in ùrtimu, sighint sas propostas de “PasseG…Giare” cun firmada cras in Bàini, e domìniga sunt protagonistas sas traditziones de sos caddos in Corte Bacas cun sa cursa a s’aneddu e sas parìllias. Domìniga sero, poi, in su Museu diotzesanu b’est “Domìniga in cuntzertu”. In ùrtimu, firmat in Gùspini su Nazra Palestine Short Film Festival.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata