S’economia sarda intre crèschida e dificultades

Su Gazetinu, martis 04 de austu de su 2026

S’economia sarda intre crèschida e dificultades – S’economia sarda creschet prus de sa mèdia natzionale, ma est frenada dae inflatzione, interessos artos e dificultades de agatare traballu. Custu lu narat sa relata de Confartigianato Sardegna “Navigare in sa mancàntzia de seguresa: sas tendèntzias de s’istiu 2026 pro s’economia e sas impresas de sa Sardegna”, fatu dae s’Ufìtziu Istùdios de s’assòtziu subra datos Istat, Ministeru de su Traballu, Svimez e Banca de Itàlia.

Pro su 2026 su Pil de s’Ìsula est cunsideradu in aumentu de s’1,1%, contras a su +0,5% natzionale e a su +0,7% de su Sud. Una crèschida chi, pro Confartigianato, mustrat sa capatzidade de resistèntzia de su sistema produtivu, ma chi devet fàghere sos contos cun unu cuntestu internatzionale contràriu e cun s’aumentu de sas ispesas pro s’energia e pro sas matèrias primas. In maju s’inflatzione est imbàtida a su 3,2%, mentres sa crisi in su Stretto di Hormuz at contribuidu a nche fàghere pigare de su 5,1% sos prètzios de eletritzidade e gas.

Pesant meda sas cunditziones pro otènnere finantziamentos. In martzu 2026 sos interessos aplicados a sas impresas sardas piticas ant tocadu su 10,6%, su prus artu de Itàlia. In su matessi tempus sos prèstidos a sas Pmi sunt minimados de su 3,3% e cussos destinados a sas impresas artesanas de su 5,3%.
Est abacadu fintzas su mercadu de su traballu. S’ocupatzione est calada a su 57,5%, màssimu in su setore de sas manifaturas (-18,7%) e de sos fràigos (-12,5%). Creschet imbetzes su traballu autònomu (+6,8%), mentres est semper difìtzile a agatare personale cualificadu: su 38,3% de sas figuras chi chircant sas impresas no est fàtzile a las agatare.

Pro su presidente regionale de Confartigianato, Giacomo Meloni, sa Sardigna tenet bonas capatzidades de reatzione, ma serbint interventos pro minimare sas ispesas de sos prèstidos, sustènnere sos investimentos de sas impresas piticas e mèdias e afortigare sa formatzione, a manera de rèndere prus praghilosos sos mestieris de s’artesania e sustènnere sa cumpetitividade de su sistema produtivu.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata