Cun s’istiu arribant sos disàgios pro sos biagiadores

Su Gazetinu, martis 21 de trìulas de su 2026

Cun s’istiu arribant sos disàgios pro sos biagiadores – B’at gente chi at comintzadu sas vacàntzias isetende oras e oras subra unu tragheto chi est abarradu blocadu in suta de su sole e chi at dèpidu atraessare s’Itàlia a su note pro resurtare a rientrare a Sardigna. In s’Ìsula, in su grofu de s’istiu, sos biàgios torrant a mustrare totu sas dificultades issoro, tramudende partèntzias e torradas a domo in unu percursu cun istorbos meda.

In sas ùrtimas dies b’at istadu disàgios meda pro chie at biagiadu in mare, in trenu e in aèreu. In mare, su tragheto Gnv partidu dae Gènova pro andare a Portu Turre est imbàtidu cun oras meda de ritardu pro neghe de unu guastu a sos motores. Pro Adiconsum Sardigna est su de tres fatos assimigiantes in prus pagu de unu mese e s’assòtziu domandat a sa cumpagnia de pagare sos dannos chi ant causadu a sos biagiadores, minetzende fintzas un’espostu pro interrutzione de servìtziu pùbblicu.

Problemas fintzas in sa rete ferroviària. Su 16 de trìulas carchi trenu de Trenitalia at fatu ritardos finas a 55 minutos, cun cunseguèntzias graes màssimu in Aristanis. Bi sunt istados custos rallentamentos ca sos impiantos no fiant funtzionende bene pro neghe de su caldu, in una de sas peus dies de s’istiu.

No est andada mègius a chie at biagiadu in aèreo. Su bolu Ryanair Pisa – Casteddu de su 15 de trìulas est istadu annulladu cando sa gente fiat giai pronta a s’imbarcu. Intre custos, duos pensionados (maridu e mugere) de Aristanis chi si sunt dèvidos organizare a sa sola cando ant ischidu chi non b’aiat hotel disponìbiles. Nche sunt fertos in Roma in trenu a su note e dae in ie ant leadu un’àteru bolu pro Casteddu, paghende giai 250 èuros dae bussaca.

Tres fatos diversos, cun su matessi resurtadu: ritardos, annullamentos e disàgios pro sos biagiadores, torrende a allummare sa dibata in contu de s’afidabilidade de sos cullegamentos cun sa Sardigna e de s’amparu de sos biagiadores.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata