Sas impresas sardas faghent sos contos cun sos tassos de sos prèstidos

Su Gazetinu, martis 07 de trìulas de su 2026

Sas impresas sardas faghent sos contos cun sos tassos de sos prèstidos – Mancari bi siat istadu un’abbacamentu de sos tassos de interesse in sos ùrtimos duos annos, sas impresas piticas sighint a pagare de prus, màssimu cando domandant prèstidos de importu bassu.

Custu nd’est essidu a campu dae un’istùdiu de sa CNA subra datos de sa Banca de Itàlia a su 31 de Nadale de su 2025, torrada a presentare dae CNA Sardigna, chi mustrat comente in s’àrea Sud e ìsulas sos finantziamentos pro sa licuididade finas a 50 mìgia èuros imbatent a unu tassu mèdiu de su 9,55%, contras a s’8,73% de sa mèdia natzionale e s’8,23% de su Nord-Est.

Sa disparidade pertocat fintzas sa mannària de su finantziamentu. Pro sos investimentos, a livellu natzionale, su tassu passat dae su 3,58% pro sos prèstidos chi sobrant su millione de èuros a su 6,08% pro cussos finas a 50 mìgia èuros. Ancora prus marcada est sa diferèntzia in sos prèstidos destinados a sa licuididade: 8,73% pro sos finantziamentos piticos contras a su 3,54% de cussos chi sobrant su millione, cun un’iscartu de prus de chimbe puntos pertzentuales.

Segundu sa CNA, a bi pèrdere sunt màssimu sos artesanos e sas impresas piticas. Mancari in cunfrontu a su 2023 su costu de su dinari siat minimadu, su benefìtziu non s’est divididu a manera totuna e su crèditu piticu est caru meda, màssimu in su Sud.

“Unu finantziamentu finas a 50 mìgia èuros serbit bortas meda a comporare unu machinàriu, a digitalizare unu protzessu o a superare una fase de tensione de cassa”, narant Luigi Tomasi e Francesco Porcu, presidente e segretàriu regionale de CNA Sardigna. “Si custu tipu de crèditu abarrat su prus caru de totu, s’arriscu est chi sos investimentos siant rimandados pròpiu in ue diant serbire de prus”.

S’assòtziu domandat duncas “garantzias pùbblicas prus de importu, una ripresa de su ruolu de Confidi e protzeduras de valutatzione de su mèritu creditìtziu prus atentas a s’istòria e a sa calidade de s’impresa e no a su faturadu suo ebbia”.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata