Sa domo in Sardigna intre ispopulamentu, ispesas e oportunidades noas

Su Gazetinu, martis 27 de santugaine de su 2026

Sa domo in Sardigna intre ispopulamentu, ispesas e oportunidades noas – Domos bòidas in sas biddas e afitos semper prus caros in sas costeras: s’Ìsula faghet sos contos cun unu mercadu de sas domos marcadu dae diferèntzias territoriales mannas e dae netzessidades abitativas in cambiamentu. Custu lu narat s’istùdiu de Confartigianato Imprese Sardegna e Nomisma chi biet in su recùperu de su patrimòniu chi b’est giai una de sas isfidas de primore pro su tempus chi at a bènnere pro s’Ìsula.

In prus de 1 millione de domos, giai 320mìgia (su 30,4%) resurtat chi non sunt ocupadas o destinadas a afitos de pagu tempus. In sos logos de s’internu sas domos disabitadas nche sobrant su 50%, mentres prus de s’80% de sas domos las còmporant in sos litorales. Su 21,7% de sos còmporos regionales resurtant in Gaddura. Unu cuadru chi s’acumpàngiat a s’ispopulamentu de sas biddas piticas e a sa dificultade pro famìllias, istudiantes e traballadores de agatare mèdios possìbiles.

Fintzas sas ispesas pro sas domos pesant subra sos bilàntzios domèsticos: sos sardos destinant a sa domo su 33,5% de su rèdditu, contras a su 26,6% de sa mèdia europea. A custu s’agiunghet unu patrimòniu edilìtziu betzu: su 61,3% de sas domos ocupadas est istadu fraigadu in antis de su 1980.

“Sa domo devet torrare a èssere un’elementu de unione sotziale e de isvilupu difusu”, narat Giacomo Meloni, presidente de Confartigianato Sardegna, ponende in craru sa netzessidade de cunformare s’oferta a sos cambiamentos demogràficos e econòmicos.

Su remèdiu passat dae su megioru de sas domos bòidas ma fintzas dae s’adatamentu e dae sos afitos istàbiles, cun modalidades de allògiu noas, comente domos pro istudiantes, domos cumpartzidas e domos adatas pro sos betzos.

S’isfida pertocat fintzas s’economia: in s’Ìsula òperant 22.780 impresas de fràigos, e de custas 13.168 sunt artesanas. A megiorare su patrimòniu cheret nàrrere a sustènnere su traballu locale e a torrare vigoria a sas biddas, culleghende sas polìticas pro sa domo a sos servìtzios, a sos trasportos e a sa calidade de sa vida.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata