Gràtzia 100: lèghere, bìvere, contare a Deledda

Su Gazetinu, giòbia 22 de mese de ledàmene de su 2026

Gràtzia 100: lèghere, bìvere, contare a Deledda – Unu sèculu a pustis de su Nobel, gràtzia Deledda torrat a faeddare a is generatziones noas cun laboratòrios, immàgines, podcast e àteras fainas. Custa est s’isfida de “Gràtzia 100. Lèghere, bìvere, contare a Deledda”, su progetu de sa Regione Sardigna pensadu dae s’Aps “Su Club di Jane Austen Sardigna”.

Sa faina at a interessare a unos 700 istudiantes de 32 classes in 16 istitutos superiores, ispartos in is oto cussòrgias de s’Ìsula: provìntzia de Aristanis, Gaddura, Casteddu, Sulcis, Campidanu, Ogiastra, provìntzia de Nùgoro e provìntzia de Tàtari. Su coro de sa faina sunt is òperas de Deledda e s’atualidade issoro, comintzende dae is faeddos “Semus canna, e sa sorte est su bentu”. Sa punna de su progetu est sa de furriare “sa memòria a esperièntzia bia e partetzipada”, comente narat s’assessore de sa Cultura Ilària Portas. Totu custu pro lassare un’eredade culturale a pustis de is regordos de su Nobel.

Su progetu est partzidu in bator partes: “Iscobèrrere a Gràtzia”, cun s’introduida a sa figura de s’autora e a su cuntestu de is òperas suas; “Bìvere a Gràtzia”, cun laboratòrios de iscritura, immàgine e immedesimatzione; “Contare a Gràtzia”, cun su faghimentu de video, podcast, reading e àteras fainas; in fines, “Addobiare a Gràtzia”, cun rapresentàntzia de is istudiantes in Nùgoro, intra de sa Domo museu e sa Crèsia de sa Soledade, pro cumpartzire is fainas fatas.

“Unu clàssicu sighit a bìvere isceti si is generatziones noas ddu podent addobiare, lèghere e si ddi podent fàghere is pregontas issoro”, narat sa diretora artìstica Giudita Sireus.

Su progetu punnat a fàghere nàschere una retza regionale intra de iscolas, bibliotecas, museos e entes culturales, pro cumpartzire ainas e materiales fintzas a pustis de is laboratòrios. A primìtzios s’at a cuncordare una mapa de is iscolas e de is realidades culturales in ue traballant, sa nàschida de sa Retza e s’abertura de sa manifestatzione de interessu pro is istitutos segundàrios de segundu gradu de sa Sardigna.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata