Is siendas sardas depent fàghere is contos cun is bulletas semper prus caras

Su Gazetinu, mèrcuris 30 de cabudanni de su 2026

Is siendas sardas depent fàghere is contos cun is bulletas semper prus caras – In is ùrtimos ses meses, ònnia bator impresas piticheddas sardas, tres ant connotu s’incarimentu de is bulletas. E pro agiomai una ònnia chimbe, intra de cussas interessadas dae custu incarimentu, sa crèschida de su costu at propassadu su 20%. S’incarimentu de s’energia amegat de torrare a mossigare su sistema produsidore de s’Ìsula, ismenguende su balàngiu e firmende is investimentos. Custu est su chi nde essit a pìgiu dae sa chirca de sa CNA in contu de “Energia e impresas piticheddas”, fata dae sa CNA Sardigna.

Sa chistione de s’incarimentu de s’energia est unu barrancu mannu pro sa cumpetitividade. Pro s’84% de is impresas su costu de s’energia cunditzionat a manera grae sa faina de is siendas: pro su 39,1% est grae meda, pro su 44,9% est bastante grae. Su 78,2% si ponet pistighìngiu pro is cunsighèntzias chi is tìrrias geopolìticas tenent pro s’energia e pro s’86,7% in s’ùrtimu annu est crèschidu su livellu de allarme ligadu a s’incarimentu de su costu.

Is efetos malos s’intendent prus che totu in sa parte de su balàngiu. Su 56,8% de is impresas decrarat un’ismèngua de su balàngiu, mentras su 20,4% nch’est resessidu a carrigare a su mancus una parte de s’incarimentu de is costos in su prètziu de is benes e servìtzios. In su 2,7% dei is impresas s’incarimentu de su costu de s’energia at portadu a ismenguare su produsimentu o is servìtzios.

Pro sa CNA Sardigna serbint prus trasparèntzia de su mercadu, ainas chi si-nde potzant bàlere is impresas micro e piticas e serbint interventos istruturales. “Is datos de sa chirca chi sa CNA at fatu in Itàlia”, decrarant Luigi Tomasi e Francesco Porcu, presidente e segretàriu de sa CNA Sardigna, “tirant una fotografia de una cunditzione grae chi in Sardigna s’intendet prus chi no in àteras regiones. Is impresas nostras, difatis, realidades artesanas pro su prus micro e piticas, non tenent poderiu cuntratuale pro tramudare custu incarimentu a su prètziu de is produsimentos o de is servìtzios e, duncas, ismènguat su balàngiu issoro e mìnimant is resursas disponìbiles pro investire e criare ocupatzione”.

Tomasi e Porcu domandant duncas una polìtica energètica chi pighet in cunsideru is piessignos de s’Ìsula nostra e is barrancos chi nche tenimus.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata