Dae Ispagna a S’Alighera: 18 giornalistas e influencer pro iscobèrrere sa tzitade

Su Gazetinu, martis 22 de cabudanni de su 2026

Dae Ispagna a S’Alighera: 18 giornalistas e influencer pro iscobèrrere sa tzitade – Ite tenent a cumone Ispagna e S’Alighera? Una limba, un’istòria e una cultura chi oe in die passant peri sas carreras de sa tzitade catalana de Sardigna. Subra custas afinidades sa Fundatzione de S’Alighera puntat pro afortigare sa promotzione turìstica in su mercadu ibèricu: 18 intre giornalistas e influencer bènnidos dae Bartzellona, Madrid e Valèntzia sunt istados istrangiados su 4 de cabudanni passadu in su Belvedere pro unu biàgiu-stampa pro iscobèrrere sa tzitade.

Duas dies pensadas pro faeddare de una S’Alighera diversa dae su logu de mare ebbia, capatza de atirare bisitadores totu s’annu cun sa cultura, sas traditziones, s’archeologia e s’eno-gastronomia. Intre sas tapas fatas dae su grupu, cumpostu dae professionistas de biàgios e de istiles de vida, – e intre custos una firma fde El País – su tzentru istòricu, su Museu de su Corallu e sos sitos archeològicos de Palmavera e Ànghelu Ruju, e in prus sos assàgios de produtos tìpicos.

Su sèberu de s’Ispagna no est fatu a casu. A sas raighinas catalanas profundas de S’Alighera si agiunghet su cullegamentu diretu in mare intre Bartzellona e Portu Turre, fatu dae Grimaldi Lines fintzas in ierru. Un’oportunidade pro fàghere bènnere sos turistas totu s’annu.

“Su mercadu ispagnolu pro nois est de primore”, at naradu su presidente de sa Fundatzione de S’Alighera, Graziano Porcu, “non solu pro sa vitzinàntzia culturale chi nos aunit a sa Catalugna, ma fintzas pro sas possibilidades de cullegamentu chi faghent a manera chi si potzat arribare a S’Alighera cun fatzilidade”.

In fines, su biàgiu-stampa si inseriat fintzas in su calendàriu prenu de eventos de su Sant Miquel Festival, patronu de S’Alighera. Su grupu de bisitadores ispagnolos at tentu s’ocasione de pòdere assìstere sàbadu passadu a sa 1ª Trobada Gegantera de l’Alguer chi nch’at leadu, intre su portu e su tzentru istòricu, s’isfilada de sos gegants, cun mùsica e ballos.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata