Su traballu in s’Ìsula in sa relata noa de sa Cisl Sardigna

Su Gazetinu, martis 8 de cabudanni de su 2026

Su traballu in s’Ìsula in sa relata noa de sa Cisl Sardigna – Creschet su traballu in Sardigna, ma non creschet meda su valore suo. Est sa fotografia chi essit a campu dae sa relata “Sardigna, su valore de su traballu. Salàrios, ocupatzione, produtividade, cuntratatzione e isvilupu” fata dae su Tzentru Istùdios “Giannetto Lay” de sa CISL Sardigna e chi s’at a presentare su 9 de cabudanni in Casteddu.

Intre su 2023 e su 2025 sos ocupados sunt passados dae giai 577 mìgia a giai 598 mìgia: binti unu mìgia in prus in duos annos. In su 2025 su tassu de ocupatzione de sos chi teniant dae 15 a 64 annos est imbàtidu a su 58,2%, in cunfrontu a su 57,7% de s’annu in antis. Sa Sardigna sùperat sa mèdia de su Sud ma abarrat distante dae cussa natzionale. A palas de sa crèschida però b’at puru situatziones diferentes meda: in su 2025 su tempus indeterminadu at contribuidu a sas positziones noas, mentres in su 2026 s’aumentu est istadu trainadu dae sos cuntratos a tèrmine.

Su datu in contu de pagas càmbiat sa prospetiva. Intre su 2008 e su 2023 sas pagas mèdias de sos dipendentes privados sardos nche sunt caladas de su 15,2%, contras a su – 6,2% natzionale. In su 2023 sas dies pagadas fiant su 72,9% de cussas chi si podiat traballare, contras a su 78,9% natzionale, diferèntzia chi ispiegat pro ite sa distàntzia in sos rèdditos annuales siat ancora prus manna. Intre su 2019 e su 2025 sa Sardigna at pèrdidu giai 6.900 giòvanos laureados italianos intre sos 25 e sos 34 annos.

«Non bastat prus a contare sos ocupados – narat Pier Luigi Ledda, Segretàriu generale de sa CISL Sardigna –. Tocat de medire sa calidade de su traballu: istabilidade, continuidade, paga, professionalidade, formatzione, seguresa e possibilidade de crèschida». Dae inoghe sa proposta de unu Patu regionale pro produtividade, salàrios e calidade de su traballu, chi pòngiat paris investimentos, innovatzione, formatzione e cuntratatzione de segundu livellu. «S’isfida bera est a fàghere crèschere paris produtividade e salàrios», concruit Ledda.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata