Un’Ìsula de eventos in sa coa de chida

Su Gazetinu, chenàbura 7 de austu de su 2026

Un’Ìsula de eventos in sa coa de chida – Addòbios meda in s’Ìsula in custa coa de chida.

In Nora sighit sa de 17 editziones de su International Nora Jazz Festival “Women in Jazz”. Custu sero campu lìberu a sa grandu dantza cun “La Notte delle Stelle” chi faghet riferimentu a Gràssia Deledda e a Eleonora Duse, e cras sero b’est Sophia Thakur chi ponet paris poesia sonora, jazz e ispetàculu. Semper dae cras e finas a su 16 de austu Time in Jazz nch’at a leare sa mùsica a Belchidda e a àteros 15 comunes de su nord de Sardigna.

Est prenu finas su programma in Ogiastra, in ue finas a domìniga b’est su Festival dei Tacchi intre Iersu e Ulassa, cun ispetàculos, addòbios e laboratòrios in sos territòrios de sos Tòneris. In Iersu cras finit sa de 45 Sagras de su Binu.

In s’Arena Fenìtzia de Sant’Antiogu custu sero mùsica in direta cun sos Negrita, ùnica die in Sardigna de su grupu toscanu. In Crabas, in su Teatru de Tharros, custu sero b’est “Rhythm of the Dance”, s’ispetàculu de sa National Dance Company of Ireland pro sa rassigna “I Giganti dell’Arte”, e cras b’ant a èssere sos Dire Straits Legacy.

Sighit finas su fèstival Dromos: custu sero in Pompu apuntamentu dòpiu cun Aska Maret Kaneko, Bebo Ferra e Carlos “El Tero” Buschini, e a pustis Magalí Sare e Manel Fortià. Cras imbetzes in Masuddas b’ant a èssere Simona Molinari e Raphael Gualazzi e domìniga serrat Rokia Traoré.

Campu finas a sas traditziones custu sero in Murera cun “Màskaras” dedicada a sas màscaras traditzionales sardas.

Non mancant poi sas sagras: in Nuraxi Figus b’est sa Sagra de su Culurgioneddu frissu; in Uri sighit finas a cras sa Sagra Estiva de sa Cartzofa, in Solanas b’est “C’è Pasta per Te” e in Marrùbiu sa Sagra de su Culurgione Marrubiesu “Su Cruguxioni de Arrescotu”.

In ùrtimu, custu sero in Aristanis in su Museu Diotzesanu Arborense pro “Racconti d’estate” b’est su film “Raya e l’ultimo drago” e in su Foro Boàriu pro “Luci d’estate” b’at un’eventu nou de Studio di studi.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.

©Riproduzione riservata