Su Gazetinu, martis 23 de mese de idas de su 2025

Su Gazetinu, martis 23 de mese de idas de su 2025

In ghennàrgiu torrant is bèndidas a baratu – Cun su cumentzu de s’annu nou torrant is bèndidas a baratu de s’ierru, unu de is apuntamentos prus abetados dae is comporadores.

In Sardigna, aici etotu comente in agiomai in totu is àteras regiones de Itàlia, is bèndidas de acabbu de istajone ant a cumentzare su 3 de ghennàrgiu e ant a tènnere dura de 60 dies, oferende oportunidades de isparanniare pro sa còmpora de produsimentos meda. Su de àere seberadu su primu sàbadu de s’annu est in su surcu de is inditos bogados in totu Itàlia dae sa Cummissione pro s’Isvilupu econòmicu de sa Cunferèntzia de is Regiones e de is Provìntzia autònomas.

Is bèndidas a baratu sunt de importu pro su sistema cummertziale e pro is famìllias, pro ite favoressent sa còmpora de benes de calidade bona a prètzios de cumbèniu e agiudende, in su pròpriu tempus, totu su sistema de is butegas. Su de ddas incarrerare a primìtziu de annu est, in prus, una trassa pro is impresas, prus che totu pro cussas de is bighinados antigos chi arranguitzant a is turistas e chi, duncas, ant a pòdere gosare de sa presèntzia de bisitadores e famìllias in vacàntzia.

Sa Regione Sarda at cunfirmadu s’agiudu suo a is impresas piticheddas e mesanas, su coro de s’economia e de sa sotziedade de s’Ìsula, mentras s’assessore regionale de su Turismu, Artesania e Cummèrtziu, Franco Cuccureddu, at sutaliniadu “s’importu de favorèssere unu mercadu trasparente e cumpetidore, respetende is normas regionales chi guvernant is bèndidas foras de tempus”.

Intra de is consìgios utilosos pro is comporadores, Federatzione Moda Itàlia-Cunfcummèrtziu e Cunfcummèrtziu Impresas pro s’Itàlia regordant unas cantas règulas de importu: sa possibilidade de pòdere cambiare sa roba comporada est a sèberu de su bendidore, francu chi non siat ruinada; sa proa de is produsimentos no est a òbligu; su butegheri depet ammìtere su pagamentu cun cartas de crèditu; is produsimentos bèndidos a baratu depent tènnere piessignu de istajone; est a òbligu de inditare su prètziu betzu, s’iscontu fatu e su prètziu de acabbu, respetende is normas in vigèntzia.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2024-2025 – L.R. 22/2018, art. 22.

©Riproduzione riservata