Farmacie: i turni per il mese di gennaio

Su Gazetinu, mèrcuris 31 de mese de idas de su 2025

Is avesos pro sa note chi intrat s’Annu Nou – S’intrada de s’Annu Nou est una de is iscutas prus abetadas dae totus, càrriga de isperas bellas pro s’annu chi comintzat. Est s’ocasione in ue si saludat s’annu betzu e s’imprassat cussu nou, cun s’ispera chi batat bona sorte e sulenu. E in Sardigna puru, su 31 de su mese de idas, s’abetat sa mesunote pro cuncambiare is auras bellas.

Si ddoe pensamus, su chi intrat notesta est s’Annu Nou solare isceti, mentras in Sardigna cun su faeddu “Cabudanni”, dae su latinu CAPUT ANNI, inditamus dae tempos antigos su de 9 meses de s’annu, cando cumentzaiat s’annu agràriu nou e si faghiant is cuntratos.

Torrende a is avesos de su connotu sardu, Gràtzia Deledda nos regordat unas cantas cosas chi si faghiant in Barbàgia in ocasione de s’acabbu de s’annu betzu. Intra de custas ddoe est “Su candelarju”, un’avesu ispartu prus che totu in is biddas a inghìriu de Nùgoro, connotu fintzas – segundu is logos – comente a “Su candelarzu” o “Sa candelarja” (in Orgòsolo). S’ùrtima die de s’annu is pipios, partzidos in cambaradas, andaiant peri sa bidda pedende ofertas pro is pòberos, cun a coddu sachitos biancos otentos dae is cabidaleras.

Semper in Barbàgia ddoe fiat fintzas s’avesu de intzertare su tempus benidore cun ritos populares gràtzias a sa “meighina de s’ogru”.

Ma, pro s’intrada de s’Annu Nou, in Sardigna nche tenimus una filera de avesos chi pertocant fintzas is màndigos e sa coghina. Pro nàrrere, in logos meda aprontaiant una calidade de pane particulare, sinnu de abbundàntzia. In àteras biddas faghiant, imbetzes, su trigu cotu cun sa saba comente a aura de annada bona e de richesa.

Medas de custos avesos sunt abarrados fintzas a dies de oe, aici etotu comente in àteras regiones de Itàlia pro s’arribbu de s’Annu Nou aprontant – segundu is logos – màndigos particulares ligados a sa bona sorte, a sa richesa e a su presu pro s’annu chi amegat de intrare. Dae su “cotechinu” a su cambutzu de porcu cun lentìgia, dae is “tortellinos” cotos in brodu chi faghent in Emìlia Romagna a s’arrosu a sa milanesa, passende peri is durches de su connotu comente a is “istrùfolos” de Nàpoli, sa “cassada” sitziliana o su panetone e su pandoru.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2024-2025 – L.R. 22/2018, art. 22.